Аҟалӷьба (Ҟолбаиа) Абзагә Ҭаҭархан-иҧа (27.06.1992, Аҧсны, Гәдоуҭа араион Абӷархықә ақыҭа) – аҧсуа поет. Аҧсны ашәҟәыҩҩцәа Реидгыла далоуп (2018). Дыҩуеит аҧсышәала.

2010 ш. рзы далгеит Гәҭоуҭатәи абжьаратәи аҧсуа школ №3. Уи ашықәсан дҭалеит Аҧснытәи аҳәынҭқарратә университет афилологиатә факультет «Аҧсуа бызшәеи алитературеи» азанааҭ ала. Иҵара хиркәшеит 2015 ш. рзы.

2016-2018шш. ран Москва, М.Горки ихьӡ зху Алитературатә институт аҟны дырхысуан иреиҳаӡоу алитературатә курсқәа (апоезиа асеминар аҿы). Напхгаҩыс диман ажурнал «Новый мир» аредактор хада, апоет Василевски Андреи Витали-иҧа.

2018ш. раахыс аус Иуеит Аҧснытәи аҳәынҭқарратә университет аҧсуа литература акафедра арҵаҩыс аус иуеит.

Ажәеинраалақәа рыҩра далагеит ашкол данҭаз, 9-10 шықәса анихыҵуаз инаркны. Раҧхьаӡа акьыҧхь рбеит агазеҭ «Аҧсуа университет» адаҟьақәа рҿы 2009ш. рзы. Уи аахыс, Аҧсны иҭыҵуа апериодикатә кьыҧхь аҟны изныкымкәа иажәеинраалақәа рнылахьеит, иаагозар ажурналқәа: «Алашара», «Аҟәа-Сухум», «Аҧсынгьери», агазеҭқәа: «Аҧсны», «Еҵәаџьаа», «Бзыҧ», «Агара», «Аамҭа», ашәҟәыҩҩцәа ҿарацәа рҩымҭақәа еидызкыло ашәҟәы «Ашацкыра» рдаҟьақәа рҿы.

2011 ш. рзы далахәын Нхыҵ-Кавказ Владикавказ ақалақь аҟны имҩаҧысуаз ашәҟәыҩҩцәа ҿарацәа аҧшьбатәи реизара, иара убас Москва, ашәҟәыҩҩцәа рыҩны Переделкино, актәи Урыстәылатәи аҳәаанырцәтәи ашәҟәыҩҩцәа ҿарацәа реизара. Уи иабзоураны иажәеинраалақәа акьыҧхь рбеит ажурналқәа: «День и ночь», «Аврора», «Вестник», «Ваинах»; агазеҭ «Литературная газета».

2015-2017шш. рзы ашәҟәыҩҩцәа ҿарацәа рыбжьара ажурнал «Алашара» апремиа даҧсахеит (апоезиа ажанр аҟны).

Аҭыжьымҭақәа: аҧсышәала: Афцырҟьа. Ажәеинраалақәа. Аҟәа, 2013; Амра ақәла. Ажәеинраалақәа. Аҟәа, 2018.