Гердов Константин Николаи-иҧа (ижәлаҵәҟьа – Соловиов; Гердов – иан лыжәла ауп) (16.02.1941, Аҧсны, Гагра) – аурыс шәҟәыҩҩы.

Урыстәылатәи ашәҟәыҩҩцәа Реидгылеи (1992), Аҧсны ашәҟәыҩҩцәа Реидгылеи, Крым ашәҟәыҩҩцәа Реидгылеи рлахәыла. Адунеи ашәҟәыҩҩцәа Рассоциациа аурыс ПЕН-Центр ҳаҭыр зқәу алахәыла.

Гагратәи аҩбатәи абжьаратәи ашкол далгеит (1958). Аус иуан Џьырхәа – ГЕС, Гагратәи атипографиаҿы нбанҟәшәаҩыс, корректорс. 1960-1965 шш. раан аҵара иҵон Москватәи аҳәынҭқарратә библиотекатә институт (ашьҭахь – Москватәи акультура аинститут) аҟны. Ҩеижәижәаба шықәса рыҩнуҵҟа аус иуан Арктика агеологиатәи, агеодезиатәи, агеофизикатәи експедициақәа рҟны, иара убас Колыма, Абжьаратәи Азиа, Ҟазахстан.

Москвеи Аҟәеи ашәҟәқәа жәпакы ҭижьхьеит.

Иҩымҭақәа рнылон Аҧсны апериодикатә кьыҧхь – агазеҭқәа «Свободная Трибуна», «Авангард» («Гагрскии вестник»), ажурналқәа «Аҟәа-Сухум», «Алашара» (А. Гогәуа, В. Амаршьан еиҭаргаз ажәабжьқәа). Иажәабжьқәа кьыҧхьын иара убас Москватәи агазеҭ «Литературная Россия», ажурналқәа: «Смена», «Литературная учеба» рҟны. Ашәҟәыҩҩы ирҿиара иазкны еиуеиҧшым ашықәсқәа раан ргәаанагарақәа рҳәахьан Ф. Искандер, В. Аксенов, Е. Евтушенко, И. Казаков, М. Капустин, Ч. Гусеинов, В. Катаев уҳәа егьырҭгьы.

Аҭыжьымҭақәа: урысшәала: Лицо встречи. Рассказы. Сухуми, 1978; Перед будущей рекой. Повесть, рассказы. М., 1984; Любимые морские города. Повести. Тбилиси, 1986; Мангул. Тайна гложет (на руинах мира). Роман о духовной и материальной жизни Крыма. Сухуми, 1991; Из Арктики, из материнского лона, из миротворной бездны. Роман. Повести. Рассказы. Сухум, 2007.