Аҧсны Аҳәынҭқарра ашәҟәыҩҩцәа Реидгыла асаит
АҦС РУС

"Амилаҭ хәыҷы алитература ду рымазар ауеит. Сара уи агәра згоит".

Д. И. Гәлиа

Аҧсны Аҳәынҭқарра ашәҟәыҩҩцәа Реидгыла

Аҧсны Аҳәынҭқарра

ашәҟәыҩҩцәа Реидгыла

ӠАӠ ДАРСАЛИА ИХЬӠ ЗХУ АҦСНЫ АШӘҞӘЫҨҨЦӘА РЕИДГЫЛА АПРЕМИА РАНАШЬОУП ИАЛКААХАЗ





Аҧсны жәлар рышәҟәыҩҩы, Д. И. Гәлиа ихьӡ зху Аҳәынҭқарратә премиа занашьоу Алықьса Гогәуа (ажәабжь «Ӡаҳкәажә» азы);

Ашәҟәыҩҩы, Д. И. Гәлиа ихьӡ зху Аҳәынҭқарратә премиа занашьоу Даур Наҷҟьебиа (ажәабжьқәа «Аҧсыжра ашьҭахь», «Аҧсаҭатә» рзы). 

 

Аҧсуа шәҟәыҩҩцәа раҧхьатәи рабиҧара иаҵанакуаз еицырдыруа ашәҟәыҩҩы, аклассик Ӡаӡ Дарсалиа диижьҭеи 120 шықәса аҵра иазкны Аҧсны ашәҟәыҩҩцәа Реидгыла уи ихьӡ зху апремиа аҧнаҵеит 2018 ш. акьыҧхь збаз иреиӷьу асахьаркыратә ажәабжь азы, аконкурсгьы рылаҳәан.

Декабр 13 рзы И.Гь Папасқьыр ихьӡ зху Аҧснытәи Амилаҭтә библиотека аҟны имҩаҧгаз Ӡаӡ Дарсалиа диижьҭеи 120 ш. аҵра иазкыз аиубилеитә хәылҧазы аҟны Аҧсны ашәҟәыҩҩцәа Реидгыла ахантәаҩы Вахтанг Аҧҳазоу еизаз ирзеиҭеиҳәеит ааигәа аконкурс аихшьалақәа шыҟаҵаз. Ҷыдала ашәҟәыҩҩцәа Реидгылаҿы иалхыз ажиури маӡала абжьыҭира иалнакааз ҩыџьа рыӡбахә рылеиҳәеит. Апремиа раҭәашьахеит: Аҧсны жәлар рышәҟәыҩҩы Алықьса Гогәуа (ажәабжь «Ӡаҳкәажә» азы), ашәҟәыҩҩы, Д.И. Гәлиа ихьӡ зху Аҳәынҭқарратә премиа занашьоу Даур Наҷҟьебиа (ажәабжьқәа «Аҧсыжра ашьҭахь», «Аҧсаҭатә» рзы). Урҭ ирыҭан адипломқәеи аҧаратә ҳамҭақәеи.

Апремиақәа рызшарала ихацыркыз аиубилеитә хәылҧазы иацҵан Ӡаӡ Дарсалиа иҧсҭазаареи ирҿиаратә мҩеи рыхцәажәарала. Уи азы ажәахә ала дықәгылеит апоет Вахтанг Аҧҳазоу. Имҩатәны дазааҭгылеит ашәҟәыҩҩы, адраматург, апублицист амилаҭтә литература арҿиараҿы илиршаз. Дырмит Гәлиа инаивагылаз ашәҟәыҩҩцәа ируаӡәку Ӡаӡ Дарсалиа аҧсуа сахьаркыратә литература ашьақәгылареи аҿиареи рус аҟны илагала маҷӡам. Иажәабжьқәеи иповестқәеи: «Ауаҩы-шас», «Абзагә», «Хамыжә уҽдыр», «Аидара иаҵаз аҭаҳмада», «Амҳаџьыр Қәабча», «Досу иразҟы» уҳәа амилаҭтә литература ахьтәы фонд иахыҧхьаӡалоуп. Идраматә ҩымҭа «Ажәытәра иагаз» акәзар, С.И.Ҷанба ихьӡ зху Аҧсуа ҳәынҭқарратә драматә театр аҟны зныкымкәа иқәдыргылахьан.

Ӡаӡ Дарсалиа ибызшәа цқьоуп, еилыххоуп, ибеиоуп, иҩымҭақәа амилаҭтә калорит рыҵубаауеит, аҧсуа ибзазара инарҵауланы уагәылаирҧшуеит.

Ашәҟәыҩҩы иажәабжьқәеи, иповестқәеи, идраматә ҩымҭақәеи ирыхцәажәауа ргәаанагарақәа рҳәеитҚ Аҧсны Ахада иабжьгаҩ Владимир Занҭариа, ашәҟәыҩҩцәа Терент Ҷаниа, Анзор Мықәба, Анатоли Лагәлаа, аҭоурыхтә ҭҵаарадыррақәа рдоктор, академик Олег Бӷажәба, Амилаҭтә библиотека аиҳабы Борис Ҷолариа, Аҧснытәи Аҳәынҭуниверситет аҧсуа литература акафедра арҵаҩы, В.П. Анқәаб ихьӡ зху акабинет аиҳабы Ахра Анқәаб.

Д.И. Гәлиа ихьӡ зху Аҟәатәи аҧшьбатәи абжьаратәи ашкол аҵаҩцәа Амина Какулиа, Милена Бигәаа, Дамир Лашәриа ажәабжь «Ауаҩы-шас» аҟнытәи ацыҧҵәахақәа ирыҧхьеит.

Анаҩс ажәа рыман Аҧснытәи аҳәынҭуниверситет астудентцәа: Милена Дарсалиа (Ӡаӡ Дарсалиа иафоризмқәа дрыҧхьеит), ашәҟәыҩҩы алитературахь дызлацәырҵыз раҧхьатәи иажәеинраалақәа ирыҧхьеит Милена Акаба, Милена Ломиа, Алиса Кархалаа.

Аҵыхәтәан Дарсалиаа риешьара  аҟнытә абырг Пата Дарсалиа ашәҟәыҩҩы диижьҭеи 120 ш. аҵра иазкны аиубилеи амҩаҧгара аиҿкаара аҧшьызгази уи иахаҵгылази зегьы иҭабуп ҳәа реиҳәеит, аклассик ихьӡ ахьырхамышҭуа азы.