Дауҭиа Валери Константин-иҧа (17.02.1936, Аҧсны, Гәдоуҭа араион Жәандәрырҧшь ақыҭа – 25.04.2009, Гагра) – апоет. Аҧсны ашәҟәыҩҩцәа Реидгыла алахәыла (1997), ашьҭахь – Аҧсны ашәҟәыҩҩцәа Рассоциациа алахәыла (2003). Дыҩуан аҧсышәала.

А.М.Горки ихьӡ зхыз Аҟәатәи аҳәынҭқарратә арҵаҩратә институт далгеит аҧсуа бызшәеи алитературеи аурыс бызшәеи алитературеи рзанааҭ ала (1961).

1961-1984 шш. раан аус иуан Цандрыҧшьтәи ашкол-интернат аҟны аҧсуа бызшәеи алитературеи рырҵаҩыс, 1994 –1995шш. рзы Гагра араион аҵара аҟәша аиҳабы ихаҭыҧуаҩыс дыҟан.

Раҧхьатәи иажәеинраалақәа рнылеит: агазеҭ «Аҧсны», ажурналқәа: «Алашара», «Амцабз», апоетцәа ҿарацәа ражәеинраалақәа реизга «Ахҿарах» (1967).

В. Дауҭиа иажәеинраалақәа ирылхны ашәақәа аҧырҵахьеит аҧсуа композиторцәа: Р.Гәымба, Б.Багаҭелиа, О.Хәынҵариа. Урҭ рыхәҭак анҵоуп афирма «Мелодиа» аҟны. Иажәеинраалақәа рыхәҭак аурысшәахь еиҭагоуп.

Аҭыжьымҭақәа: аҧсышәала: Амшыни амреи. Ажәеинраалақәа. Аҟәа, 1983;  Сҽыҩ. Ажеинраалақәа. Аҟәа, 1986; Гагрыҧшь. Ажәеинраалақәа. Аҟәа, 1987; аурысшәахь аиҭага: Отцовские заветы. Ажәеинраалақәа. Гагра, 1995.