05.12. 2019

Аԥсны ашәҟәыҩҩцәа Реидгыла аԥшьгарала И. Гь. Папасқьыр ихьӡ зху Аԥснытәи Амилаҭтә библиотека аҟны имҩаԥысит аԥсуа шәҟәыҩҩы, апублицист Владимир Басариа 85 шықәса ихыҵра иазкыз аиубилеитә хәылԥазы. Ашәҟәыҩҩцәеи арҿиаҩы игәакьацәеи реиԥш, уахь имҩахыҵит аԥсуа ҵарауаа, акультуреи аҟазареи русзуҩцәа, урҭ рхыԥхьаӡараҿы абиблиотека аусзуҩцәа, аҿар, алитература иазҿлымҳау аӡәырҩы.

Ахәылԥаз ааиртит абиблиоткеа анапхгаҩы Б. Ҷолариа, дагьалацәажәеит В. Басариа алитератураҿы илагала. Ашәҟәыҩҩы инысмҩа дазааҭгылауа, ирҿиаратә мҩа дахцәажәеит, аиқәшәара мҩаԥызгоз Аԥсны ашәҟәыҩҩцәа Реидгыла ахантәаҩы В. Аԥҳазоу. Ашәҟәыҩҩы ирҿиамҭақәа ҵакыла аԥсуа қыҭа аԥсҭазаара, анхацәа рыбзазашьа, Аԥсадгьыл ахьчаҩцәа ракәзар, рыдгьыл ахақәиҭтәраан иаадырԥшуа афырхаҵара уҳәа ирылацәажәауа иқәгылеит: Аԥсны ашәҟәыҩҩцәа Рассоциациа ахантәаҩы М. Лашәриа, ашәҟәыҩҩцәеи аҵарауааи: Т. Ҷаниа, А. Лагәлаа, Гә. Кәыҵниа, Р. Қапба, И. Миқаиа, аиубилиар дызлиааз Кәтол ақыҭа Ахадара аиҳабы В. Кәарацхелиа уҳәа егьырҭгьы.

В. Басариа ииубилеи идныҳәалауа, агәабзиареи, арҿиаратә гәацԥыҳәареи, ақәранҵыра дуи изеиӷьаршьеит.