08.05.2020

Ҷиҷико ЏЬОНУА

СЫМШЬАМБА

Са сгәы уақәшәоит, сымшьамба!
Убри азами аӡәгьы уимҭо,
Сцәа-сжьы узаду. Нас сеибыҭо,
Абзабаа цқьа исырба!

Зны усыҵоуп, зны усықәуп,
Зны суҵоуп, сымшьамба!
Абзабаа цқьа исырба,
Уахгьы-ҿынгьы амҩа сықәуп.

Аисра салоуп, аҧса еилышьра,
Асакараҿ, хыбра змам,
Ахьҭа цәгьами, уи мариам,
Аха исылшоит, о, ахысра!

Аӷа дахьыҟам са сраҳаҭуп,
Уи даҧырхуа сцоит умбои,
Акыр зычҳаз акыр имбои?
Сцәа-сжьы иаду, ушаҳаҭуп.

Атакахь санцо ахьҭа цәгьазар,
Аурҭ анасуа уара усыцуп,
Сара сгәеисра уа иҿыцуп,
Аха исгәамҧхо акы саниозар,

Аҧса еилышьра иахьа иубама,
Ашьа ануқәҭәа иумычҳаи!
Уи са исцәуӡон, иумаҳаи
Зны исҳәоз: иҟоу убама,

Ҳусқәа убасӡа ицарым,
Ҽнак ҳанылар Аҧсынра,
Уӡбахә расҳәап уа жәлара,
Ахҭыҧ иунугьы зӡахрым.

Ашьа шуқәҭәоу сызқәа укыдҵан,
Уа снеи-ааиуа усырҽхәап,
Убасҟан еиҳагь бзиа узбап,
Сыҧсы хаара уара иудҵан.

Аха убранӡа, сымшьамба,
Зны усыҵоуп, зны усықәуп,
Зны суҵоуп, амҩа сықәуп,
Абзабаа цқьа исырба.
1944