Жәларбжьаратәи аинформациатә агентра «Россия Сегдня» жәларбжьаратәи амульимедиатә пресс-центр аҟны имҩаҧган хазы шәҟәны ҩаҧхьа аҧсышәала еиҭаҭыжьу Аҧсны жәлар рышәҟәыҩҩы Алықьса Гогәуа ироман «Асду» аӡыргара. Уи амҩаҧысраан идырбан аинформациатә агентра «Спутник Аҧсны» еиҿнакааз авидеонҵамҭа, иара убас уи ахатә студиа аҟнытә ишиашоу ицоз ателецҳа.
Ароман «Асду» аиҭаҭыжьра рыбзоуроуп агәыҳалалратә еиҿкаара «Аҧсны хатәгәаҧхарала ацҳаражәҳәаҩцәа».
Аҟәа, «Спутник Аҧсны» астудиа аҟны иҟан Алықьса Гогәуа иеиҧш, ашәҟәыҩҩцәа: Даур Наҷҟьебиа, Надежда Венедиктова, Анатоли Лагәлаа.
Москватәи аӡыргарахь инеит Урыстәыла иҟоу Аҧсны ацҳаражәҳәарҭа ахаҭарнакцәа, аҧсуа диаспора аҟнытә аӡәырҩы: аҵарауаа, ашәҟәыҩҩцәа, ауаажәларратә усзуҩцәа, аҿар, астудентцәа, аурыс интеллигенциа рхаҭарнакцәа.
Ашәҟәы аӡыргараан иқәгылеит: Аҧсны адәныҟатәи аусқәа рминистр ихаҭыҧуаҩ Кан Ҭаниа, Урыстәыла иҟоу Аҧсны ацҳаражәҳәаҩ иабжьагаҩ Татиана Гәлиа, Аҧсны ашәҟәыҩҩцәа Реидгыла ахантәаҩы Вахтанг Аҧҳазоу, иара убас Урыстәылатәи асенатор, аолимпиатә чемпион Татиана Лебедева, аконкурс «Мисс Мира» аҟны иаиааихьоу, иахьа агәыҳалалратә усура знапы алаку Ксениа Сухинова уҳәа егьырҭгьы.
«Асду» аӡыргара мҩаҧысит даара азҿлымҳара аманы.