28.12.2022

Аҧсны ашәҟәыҩҩцәа Реидгыла аҧшьгарала И.Гь. Папасқьыр ихьӡ зху Аҧснытәи Амилаҭтә библиотека аҟны имҩаҧысит алитература-музыкатә композициа «Ажәеи ашәеи». Ари аусмҩаҧгатә иахаҵгылеит Аҧсны аҵареи абызшәатә политикеи рминистрра.

Ахәылҧаз рҽаладырхәит аҧсуа шәҟәыҩҩцәа, аҵарауаа, арҵаҩцәа, ашколхәыҷқәа, акультуреи аҟазареи русзуҩцәа, зиубилеитә рыцхәқәа азгәарҭоз апоетцәа ргәакьацәа.

«Ажәеи ашәеи» еиҿкаан аҧсуа поетцәа Баграт  Шьынқәба, Терент Ҷаниа, Лиолиа  Тәан-ҧҳа риубилеитә рыцхәқәа инарымаданы, ажәа азҟазацәа урҭ ражәеинраалақәа ирыҧхьон, ашколхәыҷқәа инарыгӡон амузыкахь ииагоу ашәақәа.

Ажәеинраалақәа ирыҧхьеит апоетцәа Вахтанг Аҧҳазоу, Анатоли Лагәлаа, Владимир Занҭариа, Гәында Кәыҵниа, Гәында Сақаниа, Заира Ҭҳаиҵыкә, Аинар Ҷыҭанаа, насгьы Владимир  Никонов, Саид Камкиа, Амира Ԥачлиа  уҳәа егьырҭгьы. Еизаз рҿаҧхьа дықәгылеит иара убас Амилаҭтә библиотека аиҳабы Борис Ҷолариа.

Ашәақәа нарыгӡон: Пицундатәи актәи абжьаратәи ашкол аҵаҩы Илона Хьециа,Аҟәатәи ажәабатәи абжьаратәи ашьхаруаа ршкол аҵаҩы Есениа Быҭәба, Очамчыра араион Ҭхьынатәи абжьаратәи ашкол ашәаҳәаҩцәа ргәыҧ (анапхгаҩы –  Никәала Шьынқәба), Аҟәатәи афбатәи абжьаратәи  ашкол аҵаҩы Акакь Кәыҵниа, Гәдоуҭа араион Абӷархықәтәи абжьаратәи ашкол ахор  (анапхгаҩы – Аҧсны  зҽаҧсазтәыз артист Нора Чамагәуа).

Абасала, ажәеи ашәеи хеибарҭәаауан. Аусмҩаҧгатә ашҟа имҩахыҵыз зегьы агәалаҟара бзиа рзыннажьит.