24.07.2020

Аԥсны еиԥш, анҭыҵгьы зыхьӡ рдыруа ашәҟәыҩҩы, апублицист, аҭыжьҩы, ауаажәларратәи аҳәынҭқарратәи усзуҩы Даур Наҷҟьебиа 60 шықәса ихыҵит.

 Даур Капитон-иԥа Наҷҟьебиа диит 1960 ш. ииуль 24 рзы Очамчыра араион Ԥақәашь ақыҭан. Аԥсны ашәҟәыҩҩыцәа Реидгыла далоуп (1997). Д. И. Гәлиа ихьӡ зху Аҳәынҭқарратә премиа ианашьоуп (2016; ароман «Аҵх ахықәан» азы). Дыҩуеит аԥсышәалеи урысшәалеи.

К. Ф. Ӡиӡариа ихьӡ зху Аҟәатәи ашкол-интернат № 1 далгеит (1977), иара убас Қарҭтәи аҳәынҭқарратә университет афизикатә факультет (1982). 2007—2008 шш. раан аҵара иҵон Москва, А. М. Горки ихьӡ зху Алитературатә институт ҩышықәсатәи Иреиҳау алитературатә курсқәа рҟны. 1983—1984 шш. рзы аус иуан Аԥснытәи аҳәынҭқарратә университет афизика алабораториа аҟны. Аԥсны Аџьынџьтәылатә еибашьраан (1992—1993) Аԥсуа радио аурыс ҟәша аредактор хадас аус иуан. 1985—1988 шш. раан Аԥсны ашәҟәыҩҩцәа Реидгыла алитературатә консультантс дыҟан. 1998 ш. инаркны Д. И. Гәлиа ихьӡ зху Аҳәынҭқарратә премиа рыҭаразы акомиссиа аҭакзыԥхықәу маӡаныҟәгаҩуп. 2010 ш. раахыс Аԥҳәынҭшәҟәҭыжьырҭа деиҳабуп. 2011—2014 шш. раан акәзар, Аԥсны аҵара аминистрс дыҟан.

2001—2004 шш. рзы аоппозициа иатәыз ауаажәларра-политикатә хеидкыла «Аиҭаира» агазеҭ аредактор хадас дыҟан.

Ажәабжьқәеи астатиақәеи икьыԥхьуеит ажурнал «Алашара» (1989 ш. инаркны), «Колокол-Асаркьал» уҳәа егьырҭ апериодикатә ҭыжьымҭақәа рҟны, иара убас иҩымҭақәа рнылахьеит аизга «Ахаҵарашәа». Ажәеинраалақәа. Ажәабжьқәа. Астатиақәа. (1995), ажурнал «Дружба народов» (2014) (Москва). Ипроза еиҭагоуп англыз, аерман, азербаиџьан, ақырҭуа, аиспан, асерб, ахорват уҳәа егьырҭ абызшәақәа рахь.

Аԥсышәала иҭыжьуп иажәабжьқәа реизгақәа, урысшәала иҩу ироман «Берег ночи» еиҭагоуп ақырҭуа, аерман, ахорват, асерб, аиспан уҳәа абызшәақәа рахь.

Даур Наҷҟьебиа авторс дрымоуп иара убас алитературеи Аԥсны ҳаамҭазтәи аԥсҭазаареи ирызку астатиақәа, урҭ кьыԥхьын Аԥсни Москвеи рпериодикатә ҭыжьымҭақәа рҟны.

Еиуеиԥшым ашықәсқәа раан иҭыжьу ишәҟәқәа иреиуоуп: «Ажәабжьқәа» (Аҟәа, 1989); «Аҵла» (Ажәабжьқәа. Аҟәа, 2005); урысшәала иҭыҵхьеит «Лицом к лицу» (Публицистика. Литературные отклики. Сухум, 2005); «Берег ночи». (Роман. Москва, 2007. Аиҭаҭыжьра – Аҟәа, 2009; Москва, 2012).

Ааигәа ажурнал «Алашара» адаҟьақәа рҟны икьыԥхьын ашәҟәыҩҩы ироман ҿыц «Арыма уаҩы» ахәҭақәа. Абасала, Зшәымҭа иҭагылоу аҟаза ирҿиаратә мҩа есааира аҽарҭбаауеит. Иаԥхьаҟа еиҳау аихьӡарақәа изыԥшызааит.