Маи 15 рзы Аҟәа имҩаҧысит Аҧсны алитераторцәа ҿарацәа II рсеминар.

Аҧсны ашәҟәыҩҩцәа Реидгыла еиҿнакааз асеминар мҩаҧысуан И. Гь. Папасқьыр ихьӡ зху Амилаҭтә библиотека аҟны.

Аекран аҟны иддырбон еиуеиҧшым ашықәсқәа раан ашәҟәыҩҩцәа Реидгыла имҩаҧнагаз асеминарқәа рҟнытә афотосахьақәа.

Бзиала шәаабеит ҳәа раҳәауа, асеминар ааиртит ашәҟәыҩҩцәа Реидгыла ахантәаҩы Вахтанг Аҧҳазоу.

Минуҭк аҿымҭрала дыргәаладыршәеит ааигәа зыҧсҭазаара иалҵыз Аҧсны жәлар рышәҟәыҩҩы Алықьса Гогәуа.

Анаҩс В. Аҧҳазоу иааркьаҿны ашәҟәыҩҩцәа Реидгыла аусура ахырхарҭа хадақәа ируаку аҿар аус рыдулара шымҩаҧысуа, насгьы арҿиаратә еилазаара знысхьоу амҩаҿы иалнаршахьоу далацәажәеит.

«Аҧсны алитераторцәа ҿарацәа аҩбатәи рсеминар амҩаҧгара аҿҳәара маҷк иагханы имҩаҧысуазаргьы, аҵыхәтәантәи ашықәсқәа рзы аусура еиҧҟьамызт ақалақьқәеи араионқәеи рҟны. Лассы-лассы араионқәа ҳарҭаауан, алитературатә семинарқәа мҩаҧысуан. Аҿар рҩымҭақәа еилҳаргон, ирыгу-ирыбзоу еибаҳҳәон, урҭ рахьтә иреиӷьқәоу алҧшааны ирнаҳҵон ҳжурналқәеи ҳгазеҭқәеи. Асеминарқәа реиҧш, апоезиа ахәылҧазқәа мҩаҧысуеит, ашәҟәыҩҩцәа риубилеиқәа еицазгәаҳҭоит. Араҟа ашколқәеи ҳареи аимадара бзиа ҳабжьоуп. Ари аус аҟны цҳас иҳабжьоуп арҵаҩцәа.

Ҿырҧшыс иаагозар, ҩышықәса раҧхьа Аҟәа ақалақь аҵара Аусбарҭа анапхгареи ҳареи ҳаимадара иабзоураны иҟарҵаз ахаҵгыларала ф-школк рҟны иаартын алитературатә кружокқәа. Урҭ рнапхгаҩцәа русура дырцыхцыхит, азҿлымҳара змоу аусмҩаҧгатәқәа еиҿыркаауеит, ҳаргьы ҳрыладырхәуеит. Абри аҧышәа алаҳарҵәар ҳҭахуп егьырҭ араионқәа рҟынгьы. Ари амҩа иҳаилнаркаауеит аҿар аус рыдулара шаҭаху. Уи рмилаҭ хдырра шьҭнахуеит, рхатәы бызшәа агәыблра рыланааӡоит, ашәҟәы аҧхьара иазхьанарҧшуеит, ишнеи-шнеиуа иаҧсоу ракәны руаажәлар ирылагылоит», –иҳәеит уи.

Асеминар иалахәын, Аҟәа ақалақь еиҧш, Гагреи, Гәдоуҭеи, Очамчыреи, Гәылрыҧшьи рраионқәа рҟнытә аиҳабыратә классқәа рҵаҩцәа. Урҭ реиҧш, рхатәы жәеинраалақәа ирыҧхьеит асеминар аҟны иӡырыргараны иҟаз ашәҟәы «Ашацкыра» зырҿиамҭақәа анылаз апоетцәа ҿарацәа, насгьы уажәазы уи зажәеинраалақәа агәыламлаз Асҭамыр Кәарҷиа, Аслан Занҭариа. Уи нахыс ииасын ааигәа ашәҟәыҩҩцәа Реидгыла иҭнажьыз аҿар рҩымҭақәа еидызкыло ашәҟәы «Ашацкыра» аӡыргарахь. Ашәҟәыҩҩцәа Реидгыла ацхыраарала уи еиқәлыршәеит апоет Заира Ҭҳаиҵыкә.

Аизгаҿы ражәеинраалақәа кьыҧхьуп: Королина Быҭәба, Инал Гыцба, Адгәыр Гәынба, Асмаҭ Инаҧшьба, Џьамбул Инџьгиа, Ҭамуна Кобахиа, Мураҭ Қәычба, Хьыбла Хәарцкиа, Викториа Хәырхәмал, Ефрем Ҳагба, Алмас Шьалашьаа, Альбина Анқәаб, ражәабжьқәа анылеит: Шьазина Бганба, Саида Ҳаџьым.

Аҿар рҩымҭақәа реизга ҿыц «Ашацкыра» аӡыргараан рабжьагажәақәа рыла иқәгылеит апоетцәа: Вахтанг Аҧҳазоу, Геннади Аламиа, Гәында Кәыҵниа, Гәында Сақаниа, "Ашацкыра" аиқәыршәаҩ Заира Ҭҳаиҵыкә. Аҿар ирзеиӷьаршьеит аихьӡарақәа.

«Уаҵәтәи амш знапаҿы иҟало еиҵагыло абиҧарақәа ракәхоит. Урҭ еихарҳалароуп ҳмилаҭ литература. Ихьыҧшым, иазхаҵоу Аҧсуа Ҳәынҭқарра уасхырс иамоу - аҧсуа бызшәа ауп, ус анакәха, уи аиқәырхареи арҿиареи алзыршо ируакны иҟазаауеит алитература. Машәыршақә акәым зны Дырмит Гәлиа изиҳәаз абас еиҧш иҟоу ажәақәа: «Ажәлар маҷ алитература ду рымазар ауеит. Сара уи агәра згоит».

Аҧсҭазаараҿы шәшьаҿа анеихыжәго еснагь шәхы агәрагара шәыцзааит. Усҟан шәара зегь шәылшоит.

Мҩамш шәзыҧшызааит!», – иҳәеит В. Аҧҳазоу асеминар аусура еихшьалауа.

Инамҩатәны Амилаҭтә библиотека аиҳабы Борис Ҷолариеи абиблиотека аусзуҩы Елизавета Иванбеи асеминар иалахәыз ирыдыргалеит аҿар рҩымҭақәа рҭыжьра иадҳәалоу рхатә проект, уи аҽалархәрагьы рабжьаргеит.

Аҵыхәтәан асеминар иалахәыз рнапаҿы ирыҭан Аҳаҭыртә шәҟәқәеи агәалашәаратә ҳамҭақәеи, иара убас аҧсуа поетцәеи апрозаикцәеи рышәҟәы ҿыцқәа.

Елиа Ҵышәба лҭыхымҭа