12.06.2020
Иҭыҵит Аԥсны ашәҟәыҩҩцәа Реидгыла иатәу алитература-сахьаркыратә ауаажәларра-политикатә журнал «Алашара» аҩбатәи аномер.
Аҭыжьымҭа аатуеит уи аԥҵоижьҭеи 65 шықәса аҵра аҳаҭыр азы Аԥсны ашәҟәыҩҩцәа Реидгыла иҟанаҵаз адныҳәалара ала. Сынтәа аԥсуа поет, апрозаик, апублицист Ҷиҷико Џьонуа диижьҭеи 105 шықәса ҵит. Уи инамаданы ажурнал аҟны икьыԥхьуп иажәеинраалақәа, иара убас А. Гогәуеи Б. Гәыргәлиеи иаазыркьаҿу ргәалашәарақәа. Аԥсны жәлар рпоет Рушьбеи Смыр диижьҭеи 70 шықәса аҵра иазкны ианылеит иажәеинраалақәа. Апоет Рауль Лашәриа диижьҭеи 75 шықәса ҵит. Ажурнал иакьыԥхьыз Владимир Аҳашба апоет игәалашәара иазикыз астатиа иахьӡуп «Ақәыԥшреи, апоезиеи, игәырӷьахәыз амшқәеи», иара убас ианылеит арҿиаҩы иажәеинраалақәа.
Академик Зураб Џьапуа 60 шықәса ихыҵра иазкуп Аԥсны ашәҟәыҩҩцәа Реидгыла иҟанаҵаз адныҳәалареи Валентин Кәаӷәаниа истатиа «Илыԥшааху ахьӡи». Маҳинур Папа-ԥҳа лиубилеи инадҳәаланы икьыԥхьуп лажәабжь «Каранфил» (акьыԥхь иазирхиеит Леуан Лагәлаа). Апоетцәа Белла Барцыци Лариса Макачааи риубилеиқәа раҳаҭыр азы икьыԥхьуп ражәеинраалақәа.
Аԥхьаҩцәа ирыдгалоуп апоетцәа Валери Касланӡиеи Гәында Кәыҵниеи ражәеинраала ҿыцқәа.
Аџьынџьтәылатә еибашьра Дуӡӡаҿы Аиааира 75 шықәса ахыҵра иазкуп Шьазина Аԥшьлаа лыстатиа «Зыхьӡ камыршәкәа абиԥарақәа еимырдо». С.Л. Зыхәба иеиқәыршәамҭа «Аԥсуа фольклор аматериалқәа» иазылкит аспирант Асида Агәмаа лкьыԥхьымҭа.
«Алашара» ианылеит Шьалодиа Аџьынџьал илитературатә ҭынха ахьтә атрагикомедиа «Мцада акаҳуа ахьдыршуа». Аԥхьаҩ иԥылоит иара убас Алықьса Гогәуа имшынҵақәа «Аамҭа ашьҭақәа» иацу, Терент Ҷаниа апоет Т. Аџьба истатиа «Аҿареи, абзиабареи, аҿиареи» иазкуп истатиа «Апоезиа адагьы». Аҭыжымҭа ианылеит Даур Наҷҟьебиеи Анатоли Лагәлааи реиҿцәажәара, Валентин Кәаӷәаниа истатиа «Агәыӷра узҭо раԥхьатәи ашьаҿа».
Ажурнал аҟны еиуеиԥшым ркьыԥхьымҭақәа рыла иқәгылоит Мадонна Ԥлиа, Дырмит Габалиа, Алықьса Касланӡиа. «Ҳаԥхьаҩцәа ражәеинраалақәа» арубрика еиднакылоит Џьубеи Ебжьноу иажәеинраалақәа.
«Ашәҟә ҿыцқәа» арубрикаҿы ицәыргоуп ҿыц иҭыжьу ашәҟәқәа рыхәҭак иаазыркьаҿу рыхҳәаақәа.
Ааигәа зыԥсҭазаара иалҵыз ашәҟәыҩҩы Витали Амаршьани аҵарауаҩ Владимир Агрбеи ирызкуп анекрологқәа.
