Маи 12 рзы Аԥсны жәлар рпоет Баграт Шьынқәба диижьҭеи 109 шықәса ҵит.

Иналукааша апоет, апрозаик, аҵарауаҩ-лингвист, афольклорист, ауаажәларратәи аҳәынҭқарратәи усзуҩы, афилологиатә ҭҵаарадыррақәа ркандидат, Аҧсны аҭҵаарадыррақәа Ракадемиа академик, Аҧсны жәлар рпоет, Ҟабарда-Балкартәылеи Адыгатәылеи жәлар рышәҟәыҩҩы, Асоциалисттә Џьа Афырхаҵа, Д. И. Гәлиа ихьӡ зху Аҳәынҭқарратә премиеи «Ахьӡ-Аҧша» аорден актәи аҩаӡареи занашьоу, СССР-и Аҧсни рышәҟәыҩҩцәа Реидгылақәеи Урыстәыла ашәҟәыҩҩцәа Реидгылеи  ирылаз Баграт Уасил-иҧа Шьынқәба диижьҭеи маи жәаҩа рзы 109 шықәса ҵит.

Жәлар рпоет имшира аҽны, Аҟәа,  Амҳаџьырқәа рыԥшаҳәа иаԥну ихьӡ зху апарк аҟны анышә дахьамадоу игылоу абаҟа ашҟа инеит Аԥсны Ахада Б. Гәынба, уи ихаҭыԥуаҩ Б. Бигәаа, Аԥыза-министр В. Делба, уи ихаҭыԥуаа, Аԥсны Аиҳабыра реилазаара иалоу, аԥсуа шәҟәыҩҩцәа, аҵарауаа, акультуреи аҟазареи русзуҩцәа, аҵара-ааӡара знапы алаку, аҿар, астудентцәа, ашколхәыҷқәа, апоет иҭынхацәа, уи ипоезиа абзиабаҩцәа. Абаҟа амҵан ашәҭ шьыҵәрақәа шьҭарҵеит, ажәа азҟаза ду дыргәаладыршәеит.

Б. Шьынқәба игәалашәара аҳаҭыр азы еиҿкааз амитинг аартуа Аԥсны ашәҟәыҩҩцәа Реидгыла ахантәаҩы В. Аԥҳазоу далацәажәеит жәлар рпоет амилаҭтә литература арҿиараҿы илагала ду, ҷыдала аԥсуа поезиа адунеитә поезиа аҩаӡара аҟынӡа ишхеигалаз. Иҭоурыхтә роман «Ацынҵәарах» акәзар, егьырҭ абызшәақәа рахь аиҭагарала, ҳажәлар знысхьоу амҩаҿы иҳаҩсхьоу аҭоурыхтә ӡыблара ажәларқәа анымиаларц ргәырҽаниҵоит, амҩа иаша иазхьаирԥшуеит. Абасала, амилаҭтә литература ирбеиеит. Б. Шьынқәба ихьӡ еицакра ақәымкәа иаанхоит иҩымҭақәа рыла, насгьы уи иԥсҭазаареи ирҿиаратә мҩеи еснагь иҿырԥшыганы иҟазаауеит еиҵагыло абиԥарақәа рзы.

Анаҩс иқәгылаз Аԥсны Ахада идҵала иаԥҵоу Б. Шьынқәба ихьӡ зху жәларбжьаратәи афестиваль амҩаԥгаразы аиҿкааратә хеилак ахантәаҩы ихаҭыԥуаҩ, жәлар рсахьаҭыхҩы Н. Логәуа далацәажәеит Б. Шьынқәба ижәлар рымаҵ аураҿы шьарда шилиршаз. Аамҭа уадаҩқәа дрысны игәҭакы хада анагӡара амҩа дшаныз. Ирҿиаратә ҭынха аиқәырхареи аӡыргареи ирызкхоит иааиуа ашықәс азы имҩаԥысраны иҟоу афестивальгьы.

 Б. Шьынқәба иажәеинраалақәа ирыԥхьеит  Б. У. Шьынқәба, Е. А. Ешба, Н.А. Лакоба рыхьӡқәа зху Аҟәатәи  актәи, ахәбатәи, ажәабатәи абжьаратә школқәа рҟнытә аҵаҩцәа. 

Аҵыхәтәан, Б. Шьынқәба иешьара рхаҭарнак, Аԥсны Афырхаҵа А. Шьынқәба апоет имшира аҽны игәалашәара иазкыз  аусмҩаԥгатә  еиҿызкааз, иахаҵгылаз, уи зҽалазырхәыз зегьы иҭабуп ҳәа реиҳәеит.