20.04.2020

 Аԥсуа милаҭтә культура азааҧсаҩ, ашәҟәыҩҩы, аҭҵааҩы, апублицист, аиҭагаҩ Маҳинур Папа-ԥҳа 70 ш. лхыҵит. Аԥсны ашәҟәыҩҩцәа Реидгыла гәык-ԥсыкала илыдныҳәалоит. Лаԥхьаҟа еиҳау аихьӡарақәа ҳазшаз илаҭәеишьааит.

Маҳинур диит Ҭырқәтәыла, Билеџьықь иаҵанакуа Алынџьа ақыҭан. Акыр шықәса раахыс Сҭампыл дынхоит. Аҧсны ашәҟәыҩҩцәа Реидгыла далоуп. Иланашьоуп «Ахьӡ-Аҧша» аорден ахҧатәи аҩаӡара. Лабшьҭра Аҧсны, Дал-Ҵабал иҭыҵыз иреиуоуп.

Сҭамҧылтәи ауниверситет алитературатә факультет аҟны аҵара лҵон.

Аҧснытәи аҳәынҭқарратә университет аҟны аспирантура дҭан. Омар Беигәаа иҧсҭазаареи ирҿиареи ирызкны адиссертациа азлырхиоит.

Лырҿиараҿы аҭыҧ ҷыда ааникылоит О. Беигәаа. Жәибжь шықәса лхыҵуан ашәҟәыҩҩи-аҵарауаҩи лареи анеибадырыз, иҧсҭазаара аҵыхәтәантәи амшқәа рзынӡагьы аус ицылуан. Лааҧсара маҷымкәа иадылҵеит Омар иусумҭақәа аҧсшәахь реиҭагара. Авторс дамоуп О. Беигәаа ирҿиара иазку аочерк.

Ажурнал «Алашара» ианылеит лажәабжьқәа, аҧсуаа рҭоурыхи ркультуреи ирызку лыстатиақәа. Аҭырқәшәахь еиҭалгеит аҧсуа фольклортә текстқәа, аҧсуа ҵарауааи ашәҟәыҩҩцәеи рыҭҵаарадырратә усумҭақәеи рсахьаркыратә ҩымҭақәеи: «Нарҭ Сасрыҟәеи ҧшьынҩажәи зеижәҩык иашьцәеи», «Аҧсуа жәлар репос», Б. У. Шьынқәба аус адуланы ииҩыз «Абрыскьыл», С. Л. Зыхәба ишәҟәы «Аҧсуа лакәқәа», В. Л. Бигәаа – «Аҧсны аҭоурых», В. Џь. Амаршьан ироман «Аҧсҳа» уҳәа егьырҭгьы.

Ҭырқәшәала иҭлыжьхьеит «Аҧсилиеи Ҵабали». Сҭампыл; «Раҧхьатәи аҭырқәа ҧҳәыс- асахьаҭыхҩы Миҳри Расим (Миушьфиқ) Ачба)». Сҭампыл.