Аԥсны ашәҟәыҩҩцәа Реидгыла аԥшьгарала И.  Г. Папасқьыр ихьӡ зху Амилаҭтә библиотекаҿы еиҿкаан алитератураҭҵааҩ, акритик, апублицист, Аԥснытәи аҳәынҭқарратә университет апрофессор, Аԥсны аҭҵаарадырра зҽаԥсазтәыз аусзуҩы, Д. И. Гәлиа ихьӡ зху Аҳәынҭқарратә премиа занашьоу, СССР-и, Аҧсни, Урыстәылеи  рышәҟәыҩҩцәа Реидгылақәа рлахәыла Руслан Хәанеи-иԥа ҚАПБА 90 ш. ихыҵреи ааигәа иҭыҵыз ишәҟәы «Сергеи Кәыҵниа» аӡыргареи ирызкыз ахәылԥаз.

Уахь  инаԥхьан аԥсуа шәҟәыҩҩцәа, аҵарауаа, акультуреи аҟазареи русзуҩцәа, аҿар, Аԥснытәи аҳәынҭуниверситет астудентцәа, абиблиотека аусзуҩцәа.

Аекран аҟны иааиԥмырҟьаӡакәа иддырбон ашәҟәыҩҩцәа Реидгыла  еиқәнаршәаз Руслан Қапба иҭижьхьоу ишәҟәқәеи, насгьы иҩызцәа ашәҟәыҩҩцәеи, аҵарауааи, иареи рфотосахьақәа, иара убас ашәҟәыҩҩы Сергеи Кәыҵниа  еиуеиԥшым ашықәсқәа раан иҭыхыз ифотосахьақәа. Абиблиотека аусзуҩцәа рымчала иазырхиан ацәыргақәҵа.

Ахәылԥаз аартуа Аԥсны ашәҟәыҩҩцәа Реидгыла ахантәаҩы Вахтанг Аԥҳазоу дазааҭгылеит Руслан Қапба иԥсҭазаареи ирҿиаратә мҩеи, иазгәеиҭеит иҭҵааратә усумҭақәа аԥсуа литературеи аҭҵаарадырреи рҟны лагала дуны ишыҟоу, иахьынӡахәҭоу ахәшьарагьы  шаҭатәу.  Ҷыдала дахцәажәеит уажәааигәа ашәҟәыҩҩцәа Реидгыла ахаҵгыларала аҳәынҭшәҟәҭыжьырҭаҿы иҭыҵыз ишәҟәы «Сергеи Кәыҵниа».

Ргәаанагарақәеи, ргәалашәарақәеи, рзеиӷьашьарақәеи рыла ахәылԥаз аҟны иқәгылеит: ашәҟәыҩҩы, ажурнал «Алашара» аредактор хада Анатоли Лагәлаа, Аԥсны абыргцәа рхеидкыла ахантәаҩы Аполлон Думаа, ауаажәларратә узуҩы Виачеслав Цыгәба, апоет, ахәыҷтәы журнал «Амцабз» аредактор хада Гәында Сақаниа, аҵарауаҩ ҿа Инал Гыцба, Амилаҭтә библиотека аиҳабы Борис Ҷолариа, апоет Гәында Кәыҵниа. Қапаа риешьара аҟнытә аиубилеитә             хәылԥазы еиҿызкаази уи зҽалазырхәызи иҭабуп ҳәа реиҳәеит Валери Қапба, иара убас аиубилиар иҭаацәа рҟнытә даараӡа иҭабуп ҳәа ахырҳәааит  ихшара   Адгәыри Светланеи Қапаа.

Руслан Қапба 200 инареиҳаны астатиақәеи аочеркқәеи дравторуп, 38 шәҟәы ҭижьхьеит, урҭ рахьтә амонографиақәа 24. Иусумҭақәа аҧсуа литературеи аҧсуа шәҟәыҩҩцәеи аҵарауааи ирызкуп.

Зыҧсҭазаареи зырҿиареи ҭиҵаахьоу иреиуоуп: Қь. Ҟ. Агәмаа, Л.Б. Кәыҵниа, И.Г. Папасқьыр, Л.Б. Лабахәуа, С.М. Қәычбериа, М.А. Лакрба, Шь.М.  Аџьынџьал, В. П.  Анқәаб, Г.К. Гәыблиа, А.Б. Возба, Хә.С. Бӷажәба, В.С. Занҭариа, Џь.В. Аҳәба, П.Хә. Бебиа, Р.К. Џьопуа, В.Џь. Амаршьан, Б.А. Гәыргәлиа, Т. М. Ҷаниа, Ш.И. Хокерба, Ш.К. Бганба,  А.З. Кәарҷиа, С. А. Кәыҵниа  уҳәа егьырҭгьы.

Иааиԥмырҟьакәа, абжьааԥнеиԥш, истатиақәеи иочеркқәеи рнылоит апериодикатә ҭыжьымҭақәа: ажурнал «Алашара», агазеҭқәа:  «Аҧсны», «Аамҭа», «Еҵәаџьаа», еиуеиҧшым аизгақәа уҳәа.

Аурысшәахь еиҭагоу ишәҟәқәа иреиуоуп: Рыцарь Аламыса. (Повесть о жизни и творчестве Михаила Лакербая).  М., 1988; Михаил Лакербай. (Жизнь и творчество). (Второе, исправленное и дополенное издание). Сухум, 2008; Хухут Бгажба. Жизнь и творчество. Сухум, 2010.