Аҧсны акультура аминистрреи Аҧсны ашәҟәыҩҩцәа Реидгылеи рҟнытә адоуҳатә культура ҳаҭыр ззақәу ааҧхьара рыман ииуль 22 рзы С.И. Ҷанба ихьӡ зху Аҧсуа ҳәынҭқарратә драматә театр аҟны имҩаҧысуаз, еицырдыруа аҧсуа поет, апрозаик, алитератураҭҵааҩ, акритик, апублицист, ауаажәларратә усзуҩы Борис Алмасхан-иҧа Гәыргәлиа диижьҭеи 90 шықәса аҵра иазкыз аиубилеитә хәылҧазы «Аныҟәашәа» ашҟа.  

Атеатр аҩбатәи аихагыла афоие аҟны еиҿкаан Борис Гәыргәлиа  ифотосахьақәеи, ишәҟәқәеи, иара изкны апериодикатә кьыҧхь ианылахьоу  икьыҧхьымҭақәеи рцәыргақәҵа (ашәҟәқәа рцәыргақәҵа еиҿыркааит Амилаҭтә библиотека аусзуҩцәа). Ахәылҧаз иаҭааз рзы еиҿкааз ацәыргақәҵа Борис Гәыргәлиа инысмҩа даҽазныкгьы иазхьанарҧшит.

Аиубилеитә хәылҧазы ашҟа имҩахыҵит ашәҟәыҩҩцәа, аҵарауаа, аинтеллигенциа рхаҭарнакцәа, ауаажәларратә усзуҩцәа, аҿар, алитература абзиабаҩцәа, зиубилеи азгәарҭоз арҿиаҩы иҭаацәа, игәакьацәа, иуа-иҭахы, иааигәаны дыздыруаз иҩызцәа-иқәлацәа. Аиубилеитә хәылҧазы рҽаладырхәит Аҧсны Ахада Б. Гәынба, уи иусбарҭа анапхгаҩы Б. Ешба, Аҧсны Аҧыза-министр В. Делба, уи актәи ихаҭыҧуаҩ Џь. Нанба, ихаҭыҧуаҩ В. Миносиан, Аҧсны Жәлар Реизара Аиҳабы ихаҭыҧуаҩ Ф. Аҩӡба, Аҧсны Акультура аминистр Д. Ақаҩба уҳәа егьырҭ аминистррақәеи аусбарҭақәеи рнапхгаҩцәа, Аҟәа ақалақь Ахадара анапхгара рхаҭарнакцәа, ауаажәларратәи аҳәынҭқарратәи усзуҩцәа, акультуреи аҟазареи рымаҵ зуа.

Аиубилеитә хәылҧазы мҩаҧигон Аҧсны жәлар рартист Кь. Ҳагба. Ахәылҧаз аартра ашьҭахь иқәгылеит Аҧсны Аҧыза-министр актәи ихаҭыҧуаҩ Џь. Нанба, Аҧсны ашәҟәыҩҩцәа Реидгыла ахантәаҩы В. Аҧҳазоу, Аҧснытәи аҳәынҭқарратә университет апрофессор А. Касланӡиа, Аҟәатәи Иаарту аинститут аректор В. Кәарҷиа, апоет, ауаажәларратә узуҩы Г. Аламиа.    Иазгәарҭон зымҽхак ҭбааз арҿиаҩы амилаҭтә литературеи аҭҵаарадырреи рҟны илшамҭақәа, илагала хашҭра ақәымкәа ишаанхо. Алитература-театртә композициа «Аныҟәашәа» иалахәын Аҧсуа театр артистцәа, ирыҧхьон апоет иажәеинраалақәа, иҩымҭақәа рцыҧҵәахақәа, иара убас апоетцәа А. Лагәлаа, Гә. Сақаниа. Иныбжьаршә-аабжьаршәны аекран аҟны ицәырҵуан Б. Гәыргәлиа иқәгыларақәеи иҿцәажәарақәеи рҟнытә авидеонҵамҭақәа рцыҧҵәахақәа.

Алитература-театртә композициа «Аныҟәашәа», иара убас  иажәабжь  «Амаҿаҭыҧ» иалхны ҿыц иҭыху афильм арежиссиорс дрымоуп М. Аргәын (афильм аҩбатәи арежиссиор – И. Хәарцкиа).

Ахыркәшараан ахәылҧаз аҵакы еиҳагьы  иханарҭәааит апоет иажәеинраалақәа иахьрыҧхьаз имаҭацәа.