26.09.2026

Ааигәа Аԥсны даҭааит еицырдыруа ашәҟәыҩҩы, апоет, апублицист, ауаажәларратә усзуҩы Марсель Салимов.

 Башкортосҭан жәлар рышәҟәыҩҩы, Урыстәылеи Белоруссиеи рҟны акультура зҽаԥсазтәыз аусзуҩы Марсель Шаинур-иԥа Салимов  Урыстәылеи Башкортосҭани рышәҟәыҩҩцәа Реидгылақәеи Урыстәылеи Белоруссиеи ржурналистцәа Реидгылақәеи  дрылоуп. Еиуеиԥшым алитературатә премиақәа ианашьоуп.

М. Салимов диит 1949 ш. ианвар 3 рзы Башкортосҭан. Башкириатәи аҳәынҭқарратә университет афилологиатә факультет ибзиаӡаны далгеит (1971), иара убас 1980 ш. Свердловсктәи Иреиҳау апартиатә школ аҟны қәҿиарала иҵара хиркәшеит. Амаиор ичын змоу Асовет ар рафицар, еиуеиԥшым ашықәсқәа раан ирратә уалԥшьа наигӡон Польша. Даныԥхьатәак ашьҭахь абашкир сатиратә журнал «Хенек» аредактор хадас дыҟан. 1996–2006 шш. раан Башкортосҭан ажурналистцәа Реидгыла ахантәаҩыс аус иуан. Аурыс, абашкир, аҭаҭар, аузбек, аукраин, ачуваш, англыз, аболгар  уҳәа 50 инареиҳаны абызшәақәа рыла иҩымҭақәа ҭыҵхьеит.

М. Салимови аԥсуа шәҟәыҩҩцәеи аиҩызара  рыбжьоижьҭеи шьарда ҵуеит.  Абарҭ атрадициақәа гәыблрала дырзыҟоуп, убри ауп Аԥсныҟа даазгазгьы.  Марсель ҳтәылаҿы иҟазаара аан аамҭа кьаҿк иалагӡаны Гагра, Афон-Ҿыц, Аҟәа уҳәа аҭыԥ ԥшӡарақәа дырҭааит, агәҭахәыцра бзиақәагьы изынрыжьит.

Аԥсшьара мшқәа руак азы Аҟәа иаҭаара иалагӡаны уи иԥылеит Аԥсны ашәҟәыҩҩцәа Реидгыла ахантәаҩы В. Аԥҳазоу, ашәҟәыҩҩы В. Делба. Акыр шықәса раахыс асаси дареи аиҩызара рыбжьоуп, убри аҟнытә, даараны дшыҟаз заа адырра роухьан.

Ашәҟәыҩҩцәа реиԥылараан алитературатәи акультуратәи усеицура арҿиара аганахьала наҟ-ааҟ азҿлымҳара бзиа зауз азҵаатәқәа ирылацәажәеит. Урҭ ируакуп аҩымҭақәа аԥсшәеи абашкир бызшәеи рахь реиҭагареи ркьыԥхьреи аԥшьгара.