"Амилаҭ хәыҷы алитература ду рымазар ауеит. Сара уи агәра згоит".
Февраль 21 рзы, аҧсуа литература ауасхыр азышьҭазҵаз, Аҧсны жәлар рпоет Дырмит Иасыф-иҧа Гәлиа диижьҭеи 150 шықәса аҵра амш азы ҳдоуҳатә культура аҿиараҿы акырӡа зҵазкуа аусмҩаԥгатәқәа еиҿкаан.
Дырмит Гәлиа диижьҭеи 150 ш. аҵра иазкыз аиубилеитә усмҩаԥгатәқәа ирыцҵан Илитература-мемориалтә музеи аҟны. Арахь имҩахыҵит Аԥсны Ахада ихаҭыԥуаҩ Бадра Гәынба, Аԥсны акультура аминистр инапынҵақәа назыгӡо Динара Смыр, ашәҟәыҩҩцәа, аҵарауаа, акультуреи аҟазареи русзуҩцәа, алитература абзиабаҩцәа.
Амилаҭтә сахьаркыратә литература ахыҵхырҭаҿы игылоу, Аԥсны жәлар рпоет Дырмит Гәлиа диижьҭеи 150 ш. аҵра аиубилеи ҳтәыла ахьынӡанаӡаао иазгәарҭоит. 2024 шықәса иара ишықәсуп.
Февраль 20 рзы Д. И. Гәлиа диижьҭеи 150 шықәса аҵра иазкыз аиубилеитә хәылԥазы мҩаԥысит уи ихьӡ зху Аҟәатәи аԥшьбатәи абжьаратәи ашкол аҟны. Уахь имҩахыҵит Аԥсны аҵара аминистр актәи ихаҭыԥуаҩ Ада Кәарҷелиа, Аҟәа ақалақь ахада ихаҭыԥуаа Авҭандил Сурманиӡе, Асҭамыр Ашәба, Ахадара аҵара аусбарҭа аиҳабы Асҭанда Ҭаркьыл, акультура аҟәша аиҳабы Наала Ҳашыг, Аԥсны ашәҟәыҩҩцәа Реидгыла ахантәаҩы Вахтанг Аԥҳазоу, ажурнал «Алашара» аредактор хада Анатоли Лагәлаа, апоет Заира Ҭҳаиҵыкә уҳәа егьырҭгьы.